Festa

Sinopsi

‘Festa’ tittratta relazzjoni tossika li terġa’ tinbed kull sena meta tasal il-festa. Il-kanzunetta tittratta temi ta’ idolatrija; meta tpoġġi lil xi ħadd fuq pedestall, anke meta taf li m’humiex tajbin għalik. Din id-darba r-relazzjoni ser tintemm hawn, darba għal dejjem.

Bijografiji

Hannah Theuma - Artista

Hannah Theuma, 21 sena, hija kantawtriċi Għawdxija. Hija bdiet tkanta minn età tenera ta’ 5 snin, però bdiet tieħu l-lezzjonijiet tal-kant mill-età ta’ 14-il sena. Sal-lum il-ġurnata kellha l-opportunità li tiġi mgħallma minn Glen Vella, Pamela Bezzina u Gillian Zammit, fejn bl-għajnuna tagħhom irnexxielha tikseb it-timbru uniku tagħha. Hannah kellha l-ewwel esperjenza tagħha fejn kantat fuq palk fit-tielet edizzjoni ta’ X Factor Malta, fl-2021/22. Hija rnexxielha tasal sal-istadju tal-Judges’ Houses. Minn hemmhekk, Hannah baqgħet tħares ’il quddiem u toħlom li xi darba toħroġ xi materjal oriġinali tagħha. Irnexxielha tagħmel dan fi Frar tal-2024, fejn nediet l-ewwel kanzunetta oriġinali tagħha bl-isem ta’ ‘Birdsong’. 

Hannah tifforma parti mill-grupp mużikali LUMOS, kwartett li jinvolvi l-istrumenti tal-korda bħall-arpa u l-vjolin amalgamati mal-perkussjoni u l-vuċi tagħha. Dan il-grupp joħloq ħoss uniku fix-xena kulturali ta’ pajjiżna.

Philippa Naudi u Bettina Muchmore - Kompożituri u Awturi

Philippa Naudi u Bettina Muchmore huma kompożituri u awturi Maltin li jiffurmaw il-grupp mużikali The New Victorians. L-aħwa jaħdmu fix-xena mużikali bħala artisti, kif ukoll fix-xena teatrali, fejn tellgħu produzzjonijiet oriġinali fosthom; ‘MARA’, ‘VII’ (Sette) u interpretazzjoni ta’ ‘Il-Fidwa Tal-Bdiewa’ għal Teatru Malta, u ‘Ħolm Tal-Milied’ għal ŻfinMalta. Mill-2015 ’l hawn, l-aħwa ħarġu żewġ albums u diversi EPs, li jinkludu singles magħrufa bħal ‘Min Jaf’, ‘Keep Me In Love’, u ‘Lie Liar”’ fost oħrajn. Riċentament tellaw it-tielet edizzjoni tal-Christmas Chapel Hop; tour ta' kunċerti f'knejjes differenti madwar Malta matul il-Milied. Huma niedu Album Tal-Milied - ‘NINNI’, fejn ippreżentaw diski mgħarufin tal-Milied b’mod ġdid, bil-lingwa Maltija. 

The New Victorians ġew ipprejmjati Artisti Tas-Sena mill-Kunsill tal-Arti ta' Malta fl-2019.

Lara Agius - Awtriċi

Lara Agius taħdem f'diversi setturi tat--teatru,iżda hi magħrufa l-iktar bħala kittieba, direttriċi, narratriċi u attriċi. Lara toħloq xogħol teatrali għal udjenzi varji u għandha interess partikolari fil-ġeneri tal-fantaxjenza, musicals u drammi domestiċi.